Rauchst an Schpeh, kummt die Heh.

Saufst a Bia, kummt di Schmia.

Rauchst an Tschick, kumman d Flick.

Saufst an Wei, kummt d Kiwarei.

Frisst an Schpeck, schpean s di weg.

Saufst an Schnops, gehst glei hops.

Weas ned kapiat, dea wiad kassiat

und arretiat, bis a pariat.

Drum:

Puiva schluckn, schpuatln, laufm,

Eneagieschpoalaumpm kaufm,

zehn Vasicharunga brenna,

jedn Tog zum Dokta renna.

Schnoi di au, hoit di grod,

treib an Schpuat, friss Salod,

schütz die Leba und den Woid,

sauf a Wossa, daun wiast oid!

Wos, du wüst a gmiatlichs Lebm?

Kaunst da glei die Kugl gebm!

Loss da sogn, wohi des fiat:

Wea si geh losst, dea krepiat!

Hackln, fiachtn, konsumian,

und auf d Nocht in d Glotzn schtian,

wäu am Schpundus und am Göd

hängt die scheene, neiche Wöd.

Oisa:

Joguat leit und Voikoanweckn.

Impfm gegn Gripp und Zeckn.

Niandlschutz und Höm aufsetzn,

waun mar in die Oaweit hetzn.

Monatlich des Bluadfett messn,

Göd aulegn ned vagessn.

Um a gsunde Wiatschoft flehn,

owa ned in d Wiatschoft gehn!

Sie haum uns des Lebm vaduabm,

iangdwie sammar olle patea,

wäu wea oiwäu und schtändig nua Fedan hod,

dem woxn kaane Fliagl mea.

Sie haum uns des Schteabm vabotn,

iagndwie haumar olle an Schiss,

vegetian wia die lebendn Totn,

wäu z Dod gfiacht hoid aa gschtuabm is.

Saufst an Rum, bringst di um,

rauchst a Pfeifm, gibst da d Schleifm,

frisst Golaatschn, kriagst a Waatschn,

saufst an Grog, trifft di da Schlog.

Alk und Nikotin bedroen

deine klaan Schpeamatozoen.

Und a Schtöözn – host mi gheat? –

bringt di sicha unta d Ead.

Host mi jetzan?

Nua ka Freid, nua ka Hetz,

Hetz varbietet das Gesetz,

nua ka Hetz, nua ka Freid,

Freid is teia und kost Zeit.

Ewich lebm! Göd ausgebm!

Noch den woan Weatn schtrebm!

Flochbüdschiam und Be-Em-Weh:

Zukumpft, du wiast wundaschee!

Sie haum uns des Lebm vaduabm,

iangdwie sammar olle patea,

wäu wea oiwäu und schtändig nua Fedan hod,

dem woxn kaane Fliagl mea.

Sie haum uns des Schteabm vabotn,

iagndwie haumar olle an Schiss,

vegetian wia die lebendn Totn,

wäu z Dod gfiacht hoid aa ...

Zurück zu den Gedichten

Zurück zu den Texten